לינק לפרוייקט זה לכניסה ולהפצה:
http://tehilon.hebapps.co.il/?do=tehilonProject&project_id=1107
* ליחצו לחיצה ארוכה להעתקה ולאפשרויות שיתוף
קריאת תהילים משותפת. כל אחד קורא פרק אחד ויחד משלימים את ספר תהילים
לרפואת שלו בן אורה
פרק לד
{א} לְדָוִד בְּשַׁנּוֹתוֹ אֶת טַעְמוֹ לִפְנֵי אֲבִימֶלֶךְ וַֽיְגָרֲשֵׁהוּ וַיֵּלַֽךְ: {ב} אֲבָרֲכָה אֶת יְהוָה בְּכָל עֵת תָּמִיד תְּֽהִלָּתוֹ בְּפִֽי: {ג} בַּיהוָה תִּתְהַלֵּל נַפְשִׁי יִשְׁמְעוּ עֲנָוִים וְיִשְׂמָֽחוּ: {ד} גַּדְּלוּ לַיהוָה אִתִּי וּנְרוֹמְמָה שְׁמוֹ יַחְדָּֽו: {ה} דָּרַשְׁתִּי אֶת יְהוָה וְעָנָנִי וּמִכָּל מְגוּרוֹתַי הִצִּילָֽנִי: {ו} הִבִּיטוּ אֵלָיו וְנָהָרוּ וּפְנֵיהֶם אַל יֶחְפָּֽרוּ: {ז} זֶה עָנִי קָרָא וַיהוָה שָׁמֵעַ וּמִכָּל צָרוֹתָיו הוֹשִׁיעֽוֹ: {ח} חֹנֶה מַלְאַךְ יְהוָה סָבִיב לִֽירֵאָיו וַֽיְחַלְּצֵֽם: {ט} טַעֲמוּ וּרְאוּ כִּי טוֹב יְהוָה אַֽשְׁרֵי הַגֶּבֶר יֶחֱסֶה בּֽוֹ: {י} יְראוּ אֶת יְהוָה קְדֹשָׁיו כִּי אֵין מַחְסוֹר לִירֵאָֽיו: {יא} כְּפִירִים רָשׁוּ וְרָעֵבוּ וְדֹרְשֵׁי יְהוָה לֹא יַחְסְרוּ כָל טֽוֹב: {יב} לְֽכוּ בָנִים שִׁמְעוּ לִי יִֽרְאַת יְהוָה אֲלַמֶּדְכֶֽם: {יג} מִֽי הָאִישׁ הֶחָפֵץ חַיִּים אֹהֵב יָמִים לִרְאוֹת טֽוֹב: {יד} נְצֹר לְשׁוֹנְךָ מֵרָע וּשְׂפָתֶיךָ מִדַּבֵּר מִרְמָֽה: {טו} סוּר מֵרָע וַעֲשֵׂה טוֹב בַּקֵּשׁ שָׁלוֹם וְרָדְפֵֽהוּ: {טז} עֵינֵי יְהוָה אֶל צַדִּיקִים וְאָזְנָיו אֶל שַׁוְעָתָֽם: {יז} פְּנֵי יְהוָה בְּעֹשֵׂי רָע לְהַכְרִית מֵאֶרֶץ זִכְרָֽם: {יח} צָעֲקוּ וַיהוָה שָׁמֵעַ וּמִכָּל צָרוֹתָם הִצִּילָֽם: {יט} קָרוֹב יְהוָה לְנִשְׁבְּרֵי לֵב וְֽאֶת דַּכְּאֵי רוּחַ יוֹשִֽׁיעַ: {כ} רַבּוֹת רָעוֹת צַדִּיק וּמִכֻּלָּם יַצִּילֶנּוּ יְהוָֽה: {כא} שֹׁמֵר כָּל עַצְמוֹתָיו אַחַת מֵהֵנָּה לֹא נִשְׁבָּֽרָה: {כב} תְּמוֹתֵת רָשָׁע רָעָה וְשֹׂנְאֵי צַדִּיק יֶאְשָֽׁמוּ: {כג} פּוֹדֶה יְהוָה נֶפֶשׁ עֲבָדָיו וְלֹא יֶאְשְׁמוּ כָּֽל הַחֹסִים בּֽוֹ:
